Մաստոդինիա․ կրծքի ցավ և այտուցվածություն

22.12.201523271

Մաստոդինիան սուբյեկտիվորեն տհաճ զգացողությունն է կաթնագեղձի շրջանում, կոշտացումն ու ցավը, այտուցվածությունը, հպվելիս բարձր զգայունությունը։ Մաստոդինիայի համախտանիշը նախադաշտանային համախտանիշի դրսևորումներից մեկն է, կարող է լինել նաև հղիության, նևրոզի, սեռահասունացման տարիք մուտք գործելու նշան, կամ էլ առաջանալ օրգանիզմում տարաբնույթ խանգարումների արդյունքում։

Մաստոդինիայի առաջացման հիմքում ընկած է հորմոնային անհավասարակշռությունը կամ հոգեհուզական խանգարումները, որոնք միջնորդավորված ազդեցություն են ունենում հորմոնների մակարդակի վրա։

Կյանքում առնվազն մեկ անգամ այս խնդրին բախվում է յուրաքանչյուր կին։ Այն առաջացնում է հոգեբանական և ֆիզիկական տհաճ վիճակ, հանգեցնում սթրեսի և աշխատունակության անկման։

Պատճառները

Մաստոդինիայի առաջացման պատճառները մեծաթիվ են, ահա հիմնականները՝

Տեսակները

Ըստ առաջացման պատճառի՝ մաստոդինիան լինում է՝

  • ֆիզիոլոգիական (սեռահասունացման տարիք, հղիություն, մենոպաուզա), 
  • ախտաբանական (կրծքի կամ հարևան օրգանների հիվանդության ախտանշան)։ 

Ըստ առաջացման բնույթի՝

  • պարբերական (առաջանում է պարբերաբար, կապված է դաշտանային ցիկլի փուլերի հետ), 
  • ոչ պարբերական (առաջանում է առանց որոշակի պարբերականության)։

Ախտանշանները

Սովորաբար պարբերաբար զգացվող ցավն անմիջականորեն կապված է լինում դաշտանային ցիկլի հետ, հաճախ զգացվում է երկրորդ փուլում։ Այն պայմանավորված է պրոգեստերոնի անբավարարությամբ կամ էստրոգենների հավելուրդային արտադրմամբ։ Դրսևորման միջին տարիքը 20-40 տարեկանն է։

Դրսևորումները՝

  • ձգող կամ նվվացող, ճնշող ցավ կրծքում, 
  • կրծքի մեծացում, փքվածություն, 
  • պտուկների և մաշկի բարձր զգայունություն, տհաճ զգացում հպվելիս,
  • տհաճ զգացողություններ երկու կրծքում էլ, 

Ոչ պարբերական ձևի դեպքում ախտանշաններն ի հայտ են գալիս անկախ ցիկլից։

Դրսևորումները՝

  • թույլ կամ այրող ցավ կրծքում, 
  • ցավն առաջանում է պարբերաբար կամ տևական է լինում, 
  • սովորաբար ցավը միակողմանի է լինում, տեղային՝ կինը կարող է հստակ ցույց տալ ցավի օջախը, 
  • արտադրություն պտուկից, 
  • կարմրածություն, 
  • կուրծքը չի փքվում և զգայունությունը չի սրվում, 
  • առաջանում է միջինում 40 տարեկանից հետո։ 

Մաստոդինիայի վտանգն այն է, որ այն կարող է լինել նորագոյացության կամ հյուսվածքների բորբոքման առաջին նշանը։ Հաճախ մաստոդինիան քողարկում է սոմատիկ այլ հիվանդությունները։

Ախտորոշումը

Մաստոդինիայի ախտանշանների ի հայտ գալուն պես հարկավոր է դիմել բժշկի, ով կզննի կուրծքը։ Հարկավոր է կատարել գեղձի ուլտրաձայնային հետազոտություն, ինչպես նաև մամոգրաֆիա, ուռուցքի կասկածի դեպքում՝ գեղձի հյուսվածքի բիոպսիա։

Սովորաբար կատարվում է արյան ընդհանուր հետազոտություն՝ ուղղված սեռական հորմոնների (էստրոգեներ, պրոգեստերոն և այլն) մակարդակի որոշմանը։

Բուժումը

Մաստոդինիայի ախտորոշմամբ և բուժմամբ զբաղվում է գինեկոլոգը և մամոլոգը։ Հիմնականում պատճառի վերացման դեպքում ցավն անցնում է առանց բուժման։ Անհրաժեշտության դեպքում՝ կախված դրությունից, բժիշկը որոշ դեղամիջոցներ է նշանակում։

Ուռուցքային և կիստոզային պրոցեսների, աբսցեսի դեպքում հարցը լուծվում է վիրաբուժության և հաջորդող թերապիայի միջոցով։

Կարդացեք՝ Կաթնագեղձի կիստա

Կանխատեսումները հիմնականում դրական են լինում։ Դեղորայքային բուժման դեպքում ցավն իսպառ վերանում է։ Ուռուցքի զարգացման դեպքում կանխատեսումը կախված է նորագոյացության տեսակից։