Կեսարյան հատում․ կա՞ քանակի սահմանափակություն

20.08.20159756

Կեսարյան հատման դիմելը հեշտությամբ ընդունվող որոշում չէ, սակայն լավ մասնագետի դիմելով՝ կարելի է խուսափել բարդություններից: Այնուամենայնիվ, այն կանխորոշում է միևնույն ծննդալուծման մեթոդը նաև հաջորդ հղիությունների պարագայում: Քանի՞ անգամ է կարելի կեսարյան հատում կատարել:

Իրականում գոյություն չունի թույլատրելիության հստակ թիվ: Ամեն ինչ անհատական է: Որոշ կանայք արագորեն վերականգնվում են կեսարյանից հետո, ոմանց դեպքում էլ հետվիրահատական ընթացքն ավելի ծանր է անցնում յուրաքանչյուր հաջորդող կեսարյանից հետո:

Գոյություն ունի ընդհանուր համոզմունք, որ յուրաքանչյուր կեսարյանից հետո բարդությունների առաջացման վտանգներն ավելանում են: Հիմնական վտանգը նախորդ կեսարյանից մնացած արգանդի սպիի պատռվածքն է։ Որոշ կանայք հնարավոր է ցանկանան դիմել բնական ճանապարհով ծննդաբերության կեսարյանից հետո: Սակայն հատկապես 2-3 կեսարյանից հետո այն չի թույլատրվում, քանի որ 2-3%-ով բարձրանում է արգանդի սպիի պատռվածքի վտանգը:

Բարդություններից խուսափելու համար բժիշկները խորհուրդ են տալիս կեսարյան հատումից հետո սպասել առնվազն 6 ամիս մինչև կրկին հղիանալը: Լավագույն ժամանակահատվածը, որն անհրաժեշտ է օրգանիզմի լիարժեք վերականգնման համար մինչև մյուս կեսարյան հատումը, 2-3 տարին է։