Վուլվիտ

06.11.2018920

Վուլվիտը վուլվայի բորբոքումն է, որն արտահայտվում է արտաքին սեռական օրգանների շրջանում անհարմարությամբ, ցավով, այրոցով և այլ ախտանշաններով, որոնց կանդրադառնանք քիչ ուշ։ Հիվանդությունը կարող է բարդանալ՝ դրսևորվելով հեշտոցի և արգանդի պարանոցի բորբոքմամբ, ինչպես նաև վերքերի առաջացմամբ։

Առաջացման պատճառները

Վուլվիտի հիմնական պատճառը սեռական օրգանների միկրոֆլորայի փոփոխությունն է։ Ախտածին հարուցիչներից են տրիխոմոնադները, գոնոկոկները, կանդիդա սնկերը և վիրուսները (օրինակ՝ հերպես)։ Հիմնականում տրիխոմոնադային, գոնոկոկային և վիրուսային վուլվիտները վարակված զուգընկերոջ հետ չպաշտպանված սեռական ակտի հետևանք են լինում։

Վուլվիտի առաջացմանը նպաստող գործոններից են՝

  • անձնական հիգիենայի կանոնների խախտում, 
  • հակաբիոտիկների ընդունում առանց վերահսկման, 
  • միզապարկի բորբոքում (ցիստիտ), 
  • շաքարային դիաբետ, 
  • ճարպակալում, 
  • շնչառական սուր հիվանդություններ, 
  • արտաքին սեռական օրգանների մեխանիկական կամ քիմիական գրգռում, 
  • ալերգիկ ռեակցիաներ, 
  • սինթետիկ ներքնազգեստի կրում և այլն։ 

Ախտանշանները

Վուլվիտի հիմնական ախտանշանները արտաքին սեռական օրգանների շրջանում այրոցն ու ցավն են, որոնք կարող են ուժգնանալ քայլելիս։ Դիտվում է նաև թափանցիկ, սպիտակավուն, դեղնավուն, կանաչավուն կամ կաթնաշոռանման արտադրություն, որը հոսում է հեշտոցից։ Հնարավոր է նաև ջերմության բարձրացում և թուլություն։ Գոնորեային վուլվիտի դեպքում գաղտնի շրջանը տևում է 2-10 օր, իսկ տրիխոմոնադայինի դեպքում՝ միջինում տասն օր։

Ախտորոշումը

Ախտորոշումը կատարվում է հետևյալ մեթոդներով՝ 

  • հիվանդի գանգատների վերլուծում և կյանքի ու հիվանդության անամնեզի հավաքագրում, 
  • արտաքին սեռական օրգանների զննում, 
  • գինեկոլոգիական բիմանուալ հետազոտություն, 
  • գինեկոլոգիական քսուքի հետազոտություն, 
  • մանրէաբանական հետազոտություն հակաբիոտիկի ընտրության նպատակով, 
  • մեզի ընդհանուր հետազոտություն, 
  • ՊՇՌ հետազոտություն։ 

Բուժումը

Վուլվիտի բուժումը ենթադրում է արտաքին սեռական օրգանների մշակում հակաբորբոքային պրեպարատներով։ Օգտագործվում են նաև հեշտոցային մոմիկներ հակամանրէային ազդեցությամբ։ Անհրաժեշտության դեպքում նշանակվում է նաև հակաբիոտիկ։ Օրգանիզմի դիմադրողականության համար նշանակվում են վիտամինային-հանքանյութային կոմպլեքսներ և իմունիտետն ամրացնող դեղամիջոցներ։ Սեռավարակի առկայության դեպքում զուգնկերը նույնպես պետք է բուժում ստանա։

Կանխարգելումը

Վուլվիտի կանխարգելումը շատ նման է սեռական ճանապարհով փոխանցվող վարակների կանխարգելմանը։

Հարկավոր է՝ 

  • վաղ հայտնաբերել և բուժել փոքր կոնքի օրգանների վարակիչ ու բորբոքային հիվանդությունները, ինչպես նաև սեռավարակները, 
  • պահպանել հիգիենայի կանոնները, 
  • պահպանակ օգտագործել, 
  • խուսափել պատահական սեռական կապերից, 
  • դիմել բժշկի առանց պաշտպանվելու սեռական հարաբերություն ունենալուց հետո, 
  • պարբերաբար (առնվազն տարին երկու անգամ) դիմել գինեկոլոգի, 
  • առողջ ապրելակերպ վարել՝ հրաժարվելով վնասակար սովորություններից, 
  • արյան մեջ վերահսկել գլյուկոզայի մակարդակը,
  • վերահսկել մարմնի զանգվածը։