Արգանդի պարանոցի ռիգիդություն

31.05.20181876

Ի՞նչն է խանգարում արգանդի պարանոցի բացվելուն և երեխայի գլխի շարժմանը։ Ծննդաբերությունը ձգձգող հիմնական գործոնը արգանդի պարանոցի ռիգիդությունն է, որի պատճառը կարող է լինել նախկինում արգանդի պարանոցի վրա կատարված վիրաբուժական միջամտությունը։

Ի՞նչ է օղի (արգանդի պարանոցի) ռիգիդությունը և ինչի՞ կարող է հանգեցնել։ Արգանդի պարանոցի ռիգիդություն ասելով հասկանում ենք մի վիճակ, որի դեպում ծննդաբերության բնականոն ընթացքը դանդաղում է և օղի բացվելն ուշանում է կամ ընհանրապես չի բացվում՝ չնայած ծննդաբերության շարունակվելուն։

Գիտենք, որ ծննդաբերելիս արգանդի ֆունկցիան կազմված է երկու համաձայնեցված, միմյանց հակադարձ պրոցեսներից՝ մարմնի մկանունքի կծկում և արգանդի պարանոցի թուլացում։ Ռեակցիաների այդ համաձայնեցվածությունը հանգեցնում է պարանոցի հետզհետե բացման։ Որոշակի ախտաբանության առկայության դեպքում մարմնի և արգանդի պարանոցի ֆունկցիաների այդ համաձայնեցվածությունը խանգարվում է և, չնայած մկանների կծկվելուն, արգանդի պարանոցը չի բացվում։

Պարանոցի ռիգիդության հետևանքով ծննդաբերությունը ձգձգվում է և կծկումները շեշտակի ցավոտ են դառնում։ Այդ ամենին կարող է միանալ նաև պտղաջրի վաղաժամ արտահոսքը և ծննդաբերության երկրորդային թուլությունը և հաջորդող բոլոր բարդությունները՝ վարակ, պտղի ասֆիքսիա։

Եթե պարանոցը շարունակում է ակտիվորեն կրճատվել, ապա հնարավոր է, որ խորը պատռվածքներ առաջանան։ Այդ պատճառով արգանդի պարանոցի ռիգիդություն ունեցող կանայք պետք է վերահսկվեն և ժամանակին օգնություն ստանան։ Արգանդի պարանոցի ախտաբանական վիճակի պատճառ կարող են լինել նյարդածին գործոնները, պարանոցի հյուսվածքների կառուցվածքային խանգարումները, ինչպես նաև այդ երկու պատճառների համակցումը։