Եղերդակ (ցիկորիա)․ օգտակար հատկություններն ու հակացուցումները

17.03.20182736

Եղերդակ (լատ.՝ Cichorium), ճարճատուկ, հնդիպե, ճառճռտուկ, կայծխոտ։ Դեղաբույս է, պարունակում է ինուլին, գլիկոզիդներ, աղաղանյութեր, շաքարներ, թթուներ, վիտամիններ C, B, խեժ և այլն։ Պատրաստուկներն օգտագործում են որպես լեղամուղ (լյարդի, լեղապարկի բորբոքումների), միզամուղ (երիկամների հիվանդությունների) միջոց, նաև փորկապության, ստամոքսաբորբի, շաքարախտի և այլ դեպքերում։ Դալար ընձյուղները, ցողուններն ու տերևներն օգտագործում են սննդի մեջ՝ որպես աղցան, արմատները՝ սուրճին փոխարինող միջոց։ Բուժման նպատակով օգտագործում են ամբողջ բույսը, սակայն հիմնականում՝ արմատը։

Տարածված է Լոռու, Կոտայքի, Վայոց ձորի, Սյունիքի և այլ մարզերում, Երևանի շրջակայքում։ Աճում է չոր մարգագետիններում, ճանապարհների և դաշտերի եզրերին, բնակավայրերի շրջակայքում։

Հոդվածում կխոսենք եղերդակի արմատից պատրաստված ըմպելիքի մասին, որն օգտագործվում է ոչ թե բուժման, այլ խոհարարական նպատակով։ Այդ ըմպելիքը սովորաբար օգտագործում են որպես սուրճի փոխարինիչ։

Եղերդակի կալորիականությունը

Լուծվող եղերդակի 100գրամը 280 կկալ է։ Ցիկորիի մեկ չափաբաժինը սովորաբար 15 կկալ է, իսկ շաքար, կաթ և այլ նյութեր ավելացնելու դեպքում համապատասխանաբար աճում է։

Օգտակար հատկությունները

Եղերդակը վիտամինների և հանքանյութերի հրաշալի աղբյուր է մարդու օրգանիզմի համար։

Անոթալայնիչ միջոց է և օգտակար է անոթների և սրտի մի շարք հիվանդությունների դեպքում, որոնք ուղեկցվում են տախիկարդիայով և իշեմիայով։

Բարենպաստ ազդեցություն է թողնում նյարդային համակարգի վրա, կարգավորում է քունը, թուլացնում լարվածությունը։

Օգնում է կարգավորել մարսողական համակարգի աշխատանքը, լավացնում է նյութափոխանակությունը, նպաստում է օրգանիզմից խարանների ու թույների դուրսբերմանը։

Խորհուրդ է տրվում ավելորդ քաշի դեմ պայքարող մարդկանց։

Թույլատրվում է նաև հղի կանանց, սակայն պետք է նախապես խորհրդակցել բժշկի հետ։

Հակացուցումները

Հակացուցված է երակների վարիկոզ լայնացման և անոթային այլ հիվանդությունների, քրոնիկ հազի, ասթմայի ու բրոնխիտի, ստամոքսաղիքային տրակտի հիվանդությունների սրացման դեպքում։ Խորհուրդ է տրվում չանցնել օրական երկու բաժակի սահմանը։

 

Նյութի կազմումը՝ www.sotskiy.am