Մագնիում․ օրգանիզմի պահանջն ու օգտակարությունը

05.03.20183079

Մագնիումը մեծ դեր է խաղում մարդու օրգանիզմում։ Այն մասնակցում է քիմիական հարյուրավոր պրոցեսների և օրգան-համակարգերի բնականոն գործունեությունն ապահովող ամենակարևոր նյութերից մեկն է։

Ինչո՞ւ է անհրաժեշտ օրգանիզմին

Մագնիումը մեծ դեր է խաղում մարդու մկանային համակարգի ճիշտ աշխատանքի գործում։

Պատասխանատու է մկանների թուլացման համար։ Ջղաձգումները, սպազմը, ծակծկոցը, աչքերի թրթռալը վկայում են օրգանիզմում մագնիումի պակասի մասին։

Ազդում է նաև սրտամկանի վրա։ Պաշտպանում է սրտի բազմաթիվ հիվանդություններից։

Ազատում է անոթների սպազմից, օգնում մաքրել դրանք աթերոսկլերոզից, ինչն իր հերթին լավացնում է արյան հոսքը, կարգավորում է արյան ճնշումը, ազատում գլխացավից, նվազեցնում ինսուլտի և ինֆարկտի առաջացման վտանգը։

Մագնիումն անհրաժեշ է կենտրոնական և պերիֆերիկ նյարդային համակարգի բնականոն աշխատանքի համար, մասնակցում է նյարդային իմպուլսների փոխանցմանը։

Այդ քիմիական տարրի շնորհիվ նյարդային բջիջները կարողանում են թուլանալ, իսկ օրգանիզմը «փրկվում է» սթրեսներից, դեպրեսիայից ու անքնությունից։

Օրգանիզմում մագնիումի բավականաչափ քանակը պաշտպանում է շաքարային դիաբետից։

Մագնիումից է կախված նաև ոսկրերի, եղունգների, ատամների ու մազերի ամրությունը։

Բարձրացնում է դիմադրողականությունը։

Խոչընդոտում է քարագոյացմանը և պաշտպանում է օստեոպորոզից։

Մասնակցում է մարսողական համակարգի աշխատանքին, բարելավում է նյութափոխանակությունը։

Նվազեցնում է դաշտանային ցավը և արգանդի լարվածությունը հղիության ընթացքում։

Նվազեցնում է օնկոլոգիական հիվանդությունների առաջացման վտանգը և դանդաղեցնում է չարորակ գոյացությունների աճը։

Նպաստում է էներգիայի արտադրմանը։

Մագնիում պարունակող մթերքներ

Մագնիում են պարունակում բուսական և կենդանական ծագման բազմաթիվ մթերքներ։ Դրանով են հարուստ դդմի սերմերը, կակոն, լոբեղենը, ձմերուկը, պանրի տարբեր տեսակները, ցորենը և այլն։

Մթերքների վերամշակման դեպքում մագնիումի քանակն զգալիորեն նվազում է։

Մագնիումի անբավարարություն

Օրգանիզմում մագնիումի անբավարարությունն անդրադառնում է գրեթե բոլոր ներքին օրգանների և համակարգերի աշխատանքի վրա։ Ուստի ախտանշաններն էլ տարբեր են լինում՝ թուլություն, մկանային ցավ ու ջղաձգում, եղունգների և մազերի փխրունություն և այլն։ Այդ նշանների դեպքում հարկավոր է դիմել բժշկի։ Մագնիումի ավելցուկն օրգանիզմում խիստ հազվադեպ է հանդիպում։