Ֆիզիկական ծանրաբեռնվածությունը պե՞տք է հղիության ընթացքում

Սպորտի օգտակարությունն օրգանիզմի համար կասկածից վեր է․ այն ամրացնում է մկանները, բարձրացնում օրգանիզմի դիմադրողականությունը, լավացնում է արյունաշրջանառությունը, բարձրացնում ընդհանուր տոնուսը և տրամադրությունը։ Այդ ամենը կարևոր է նաև հղիության ընթացքում, սակայն շատերը կարծում են, որ ապագա մայրը պետք է զգուշանա, խնայի իրեն՝ չենթարկվելով ֆիզիկական որևէ ծանրաբեռնվածության։ Այսպիսով, ֆիզիկական ծանրաբեռնվածությունը անհրաժեշտությու՞ն է հղիության ընթացքում, թե՞ ավելի շատ վնաս է պարունակում, քան օգուտ։

Եթե կինը չունի հակացուցումներ, ապա թույլ ֆիզիկական ծանրաբեռնվածությունը միայն օգտակար է։ Այն օգնում է ամրացնել մկանները, ինչը հրաշալի նախապատրաստում է ծննդաբերությանը։ Մարզումները նաև նպաստում են ճիշտ շնչելու տեխնիկայի յուրացմանը, ինչը ծննդաբերության ընթացքում շատ կօգնի՝ թեթևացնելով ցավը։ Վարժանքների ընթացքում արյան շրջանառության ուժեղացումը նպաստում է, որ սննդանյութերը և թթվածինը ավելի լավ հաղթահարեն ընկերքային պատնեշն ու հասնեն պտղին։

Մարզումներն օգնում են բարձրացնել իմունիտետը, այնպես որ ապագա մայրն ավելի դիմացկուն է դառնում տարատեսակ հիվանդությունների հանդեպ։ Բացի այդ, դրանք նվազեցնում են մեջքի ցավի, փորկապության, դեպրեսիայի և նյարդային լարվածության առաջացման հավանականությունը, ինչպես նաև քաշը վերահսկելու և ավելորդ կիլոգրամներից խուսափելու հնարավորություն են տալիս։

Հղիության ընթացքում ֆիզիկական ծանրաբեռնվածության հակացուցումներից են առաջին հերթին մոր հիվանդությունները՝ սրտանոթային համակարգի կամ ողնաշարի հետ կապված խնդիրները, սակավարյունությունը, բարձր ճնշումը, արգանդի կառուցվածքի անոմալիաները, հորմոնային խանգարումներն ու ավելորդ քաշը։ Չի կարելի ֆիզկուլտուրայով զբաղվել նաև հղիության ցանկացած բարդության դեպքում՝ տոքսիկոզ, վիժման վտանգ, գեստոզ, իսթմիկացերվիկալային անբավարարություն և ընկերքի առաջադրություն։ Որոշ դեպքերում ֆիզիկական ծանրաբեռնվածությունը թույլատրելի է, սակայն վարժությունների ինտենսիվությունը որոշում է միայն բժիշկը։

Կարևոր է ճիշտ ընտրել վարժությունների համալիրն ու թույլատրելի ծանրաբեռնվածության չափը։ Անպայման պետք է հաշվի առնել կնոջ ապրելակերպը նախքան հղիությունը և օրգանիզմը չծանրաբեռնել ավելի շատ, քան նա սովոր է։ Նշանակում է, որ եթե կինը կանոնավոր զբաղվել է սպորտով, ապա հղիության ընթացքում կարելի է շարունակել մարզումները՝ նվազեցնելով ծանրաբեռնվածությունը։ Այդ չի վերաբերում սպորտի այն տեսակներին, որոնց դեպքում հնարավոր է հարված ստանալ (ֆուտբոլ, թենիս և գնդակով այլ խաղեր), կապված են թափահարելու (հեծանվասպորտ կամ ձիավարություն) կամ ծանրություն բարձրացնելու հետ (ծանր ատլետիկա), ընկնելու ռիսկ են պարունակում (ջրացատկ, դահուկներով կամ չմուշկներով սահելը)։

Օգտակար է լողը, քայլքը, մարմնամարզությունը, աէրոբիկան, որոնք վտանգի չեն ենթարկում երեխային։ Պետք է խուսափել մարզումների չարաշահումից, քանի որ դրանք կարող ն անբարենպաստ ազդեցություն թողնել փոքրկոնքի մկանների և հոդերի վրա։ Լավագույն ընտրությունը շաբաթական երեք անգամ մեկ ժամ տևողությամբ մարզումներն են։ Եթե շունչը կտրվում է, գլխացավ կամ գլխապտույտ ունեք, հոգնել եք, ավելի լավ է դադարեցնեք և հանգստանաք։ Հետևեք ինքնազգացողությանը և երեխայի խաղին։

Ֆիզիկական վարժություններն օգտակար են բոլոր այն մայրերի համար, որոնց հղիությունն ընթանում է առանց բարդությունների, սակայն մարզումների տևողությունն ու հագեցածությունն ընտրվում է անհատապես, բժշկի խորհրդով։ Ճիշտ ընտրված վարժությունները ոչ միայն կամրացնեն օրգանիզմը և կնախապատրաստեն ծննդաբերությանը, այլև հետծննդաբերական շրջանում արագ ապաքինվելու հնարավորություն կտան։