Այն, ինչ հարկավոր է իմանալ նորածնի քնի մասին

Այն, ինչ հարկավոր է իմանալ նորածնի քնի մասին

Երեխաներին պետք է սովորեցնել քնել, ոչ թե նորածնին պարզապես թողնել անկողնում մինչ կքնի: Իսկ ինչպես է հարկավոր այդ անել: Նախ անհրաժեշտ է որոշակի պատկերացում կազմել քնի մասին: Մայրիկները կնշեն, որ հաճախ նորածիններն իրենց գրկում քնում են, իսկ երբ նրան տեղափոխում են անկողին, անմիջապես արթնանում են: Պատճառն այն է, որ մեծահասակները հեշտությամբ են անցնում խորը քնի փուլ, և հեշտությամբ չեն արթնանում, իսկ նորածինների դեպքում այլ է:

Նախ հասկանանք քնի փուլերը: Քուն մտնելիս մարմինն աստիճանաբար սկսում է թուլանալ, հանգստանալ: Առաջին փուլն այսպես կոչված non-REM (non rapid eye movement), խորը կամ դանդաղ ալիքային քնի փուլն է: Այս ընթացքում մարդու ուղեղն ու մարմինն ամենահանգիստ վիճակում են, շնչառությունը կանոնավոր է, մկանները թուլացած են: Մոտավորապես 90 րոպե անց մարդն անցնում է քնի հաջորդ փուլ, որի ընթացքում ուղեղն արթնանում է և սկսում գործել:

Այդ մարդուն հանում է խորը քնից և այժմ մարդն այսպես կոչված ակտիվ կամ արագ ալիքային քնի փուլում է (REM - rapid eye movement): Այս ընթացքում ակնագնդերը շարժվում են, մինչ ուղեղը մարզվում է: Այս փուլում մարդը երազներ է տեսնում, պտտվում անկողնում կամ նույնիսկ ծածկոցը փոխում՝ բայց առանց ամբողջությամբ արթնանալու: Այս մակերեսային և խորը քնի փուլերը հաջորդում են միմյանց մի քանի անգամ:

Այսպիսով, եթե մեծահասակը կարողանում է միանգամից խորը քնի անցնել, ապա նորածինների դեպքում նախ մակերեսային քնի փուլ է լինում, հետո միայն անցնում են խորը քուն: Մոտ 20 րոպե կամ ավելի ժամանակ է պահանջվում, որպեսզի նորածինն անցնի խորը քնի փուլ: Երեխային օրորելիս կամ գրկում քնացնելիս ուշադիր հետևեք նրան, որպեսզի կարողանաք հասկանալ, թե քնի որ փուլում է գտնվում նա: Մինչ նրա աչքերը փակ են, շնչառությունը դեռ անկանոն է, ձեռքերն ու ոտքերը գուցե ձգված են, ծալված, երբեմն կարող է ժպտալ կամ, եթե կերակրում էիք, հնարավոր է բերանը շարժի, ինչպես ուտելիս: Անհրաժեշտ է սպասել այնքան, որ երեխայի շնչառությունը կանոնավոր և հանգիստ դառնա, մկաններն ամբողջովին թուլանան, ծալված մատները բացվեն, ձեռքերն ու ոտքերը թուլացած լինեն, կարծես անկշիռ: Վերջապես նա խորը քուն է մտել և կարելի է նրան տեղափոխել առանց արթնացնելու:

Ինչպես արդեն նշվել է, քնի մակերեսային և խորը փուլերը մի քանի անգամ հաջորդում են իրար: Նորածինների դեպքում այս փուլերն ավելի կարճ են տևողությամբ, այսինքն մինչ հետևում եք անուշ քնած փոքրիկին, մեկ ժամ անց կնկատեք, որ նա կրկին անցնում է մակերեսային քնի փուլ: Շատ երեխաներ այս փուլում կրկին արթնանում են, հնարավոր է քաղց զգան: Եթե այս ընթացքում օրորոցային երգեք, փոքրիկը չի արթնանա և 10 րոպե անց կրկին կանցնի խորը քնի փուլ: Այս փուլերի տևողությունը 50-60 րոպե է, իսկ մեծահասակների դեպքում՝ միջինում 90 րոպե:

Բացի այդ, նորածիններն այնքան խորը չեն քնում, ինչպես մեծահասակները: Որքան էլ զարմանալի է, այս տարբերությունների պատճառը գոյապայքարն է: Խնդիրը նրանում է, որ հատկապես կյանքի առաջին ամիսներին փոքրիկների պահանջներն ամենաշատն են, իսկ ահա պահանջները բացատրելու ունակությունն ամենաթույլն է: Ակտիվ քունն իրականում պաշտպանում է երեխային: Ի՞նչ կլիներ, եթե նորածիններն էլ մեծահասակի պես երկար ու խորը քնեին: Իրականում այդպես նրանք չեին կարողանա արթնանալ քաղց կամ որևէ անհանգստություն զգալիս (գուցե քիթը խցանվել է և շնչառությունը խանգարվել է, կամ երեխան շոգում/մրսում է):

Այսպիսով, նորածնի քնի առանձնահատկությունները լավագույն հոգեբանական պաշտպանությունն են իրենց իսկ համար:

Բացի այս, քնի ուսումնասիրությամբ զբաղվող մասնագետները նշում են, որ նորածնի քնի տեսակն ավելի բարենպաստ և ճիշտ է, քան մեծահասակինը: Ըստ իրենց տեսության, ուղեղը զարգանում է մակերեսային քնի փուլում, քանի որ արագ ալիքային կամ REM փուլում ուղեղը չի հանգստանում. այս ընթացքում օրգանիզմում ավելանում է որոշակի պրոտեինների արտադրությունը, որոնք ուղեղի ձևավորման գլխավոր բաղադրիչն են: Հենց այս ընթացում է ուղեղը պահպանում որոշակի տեղեկություն պատկերների տեսքով, իսկ անպետք տեղեկությունը ջնջվում կամ մոռացվում է: Նորածինների քնի 90%-ը հենց REM քնի փուլն է, ինչն էլ հավանաբար ակտիվացնում է նրանց ուղեղի զարգացումը:

Ինչ է էպիզիոտոմիան և ինչպես վերականգնվել դրանից հետո

Ինչ է էպիզիոտոմիան և ինչպես վերականգնվել դրանից հետո

Ծննդաբերության ժամանակ հեշտոցը լայնանում է, բայց երբեմն դա կարող է բավարար չլինել երեխայի գլուխը տեղավորելու համար

Ի՞նչ անել, եթե առանց որևէ պատճառի կապտուկներ են առաջանում

Ի՞նչ անել, եթե առանց որևէ պատճառի կապտուկներ են առաջանում

Կապտուկը անոթների վնասվածքի պատճառով մաշկի վրա առաջացած արյունազեղումն է

Ստամոքսի քաղցկեղ

Ստամոքսի քաղցկեղ

Ընթացակարգի ժամանակ ստամոքսի մեջ մտցվում է հատուկ սարք, որի միջոցով բժիշկն ուսումնասիրում է ստամոքսի բոլոր հատվածները, ինչպես նաև 12-մատնյա աղին։

Ինչպե՞ս է գործում հղի կանանց դիմադրողականությունը

Ինչպե՞ս է գործում հղի կանանց դիմադրողականությունը

Գենի և դիմադրողականության տեսանկյունից՝ պտուղը օտար օրգանիզմ է կնոջ համար