Ինչպե՞ս կարող է հոդատապն (պոդագրա) ազդել ձեր կյանքի որակի վրա, և ինչպե՞ս խուսափել դրանից
Ինչպե՞ս կարող է հոդատապն (պոդագրա) ազդել ձեր կյանքի որակի վրա, և ինչպե՞ս խուսափել դրանից
Հոդատապը հիվանդություն է, որը զարգանում է պուրինի նյութափոխանակության խանգարման հետևանքով, ինչի արդյունքում հիմնականում հոդերում առաջանում են միզաթթվի բյուրեղներ։
Հիվանդությունն ուղեկցվում է կտրուկ ուժեղ ցավով, կարմրությամբ, այտուցով, մաշկի «այրման» զգացողությամբ։ Ամենից հաճախ հոդատապն ախտահարում է ոտքի բթամատի հոդը, սակայն արթրիտի այս տեսակը միայն ոտնաթաթի հոդերի ախտահարմամբ չի սահմանափակվում և կարող է ազդել ցանկացած հոդի վրա՝ ծնկներ, կոճեր, արմունկներ, դաստակներ, մատներ և այլն։ Սկզբում նոպաները բավականին կարճատև են լինում և շաբաթներով կամ ամիսներով չեն կրկնվում։ Սակայն այդ ընթացքում բորբոքումը զարգանում է և շարունակում ախտահարել հոդերը։
Հոդատապի յուրաքանչյուր հաջորդ նոպան դառնում է ավելի երկարատև և ուժգին:
• Ինչո՞ւ է առաջանում հոդատապ
Հոդատապը զարգանում է հոդերում կուտակված միզաթթվի բյուրեղների պատճառով։ Իսկ միզաթթուն իր հերթին պուրինների (նյութեր, որոնք որոշ տեսակի սննդի և խմիչքների մաս են կազմում) քայքայման արտադրանքն է։
Սովորաբար օրգանիզմը հեռացնում է միզաթթուն հետևյալ կերպ՝ լուծարում է այն արյան մեջ, այնուհետև արյունը մղում է երիկամներ, որտեղից էլ միզաթթուն դուրս է գալիս մեզի միջոցով:
Բայց երբեմն այս գործընթացի ժամանակ կարող են առաջանալ խնդիրներ՝ արյան մեջ միզաթթվի բարձր մակարդակի կամ երիկամների հիվանդության պատճառով: Այս դեպքում միզաթթուն կարող է կուտակվել օրգանիզմում՝ ձևավորելով սուր բյուրեղիկներ հոդերի կամ շրջակա հյուսվածքների մեջ: Հենց դրանք էլ ցավ են պատճառում, առաջացնում այտուց ու քրոնիկ բորբոքում: Ինչո՞ւ է առաջանում հոդատապը։
Ամենատարածված գործոններն են՝
• Անառողջ սննդակարգը.
գարեջուր, գազավորված ըմպելիքներ, ենթամթերք, նրբերշիկ, երշիկ, կիսաֆաբրիկատներ, ապխտած մթերքներ։
• Սեռը և տարիքը
Նախկինում հոդատապը համարվում էր «արական» հիվանդություն, քանի որ հիմնականում տղամարդիկ էին տառապում հոդատապով: Պատճառն այն է, որ տղամարդու օրգանիզմն արտադրում է ավելի շատ միզաթթու: Հիվանդության ռիսկն առավել մեծ է 30-40 տարեկանում։
• Ավելորդ քաշ
Որքան բարձր է մարմնի զանգվածը, այնքան բարձր է հոդատապի զարգացման ռիսկը:
• Վերջերս ունեցած վնասվածքներ, վիրահատություն, ֆիզիկական գերծանրաբեռնվածություն։ Նման պայմաններում օրգանիզմն ավելի շատ միզաթթու է արտադրում:
• Որոշ հիվանդություններ, ինչպիսիք են՝ հիպերտոնիան, շաքարախտը, երիկամների և սրտի հիվանդությունները։ Այս հիվանդությունները կարող են արյան մեջ ավելացնել միզաթթվի մակարդակը:
• Որոշ դեղերի ընդունում, դրանք են հիպերտոնիայի բուժման համար նախատեսված դեղամիջոցները և սալիցիլատ պարունակող դեղերը:
• ժառանգականություն, եթե ձեր հարազատներից որևէ մեկի մոտ առկա է հոդատապ, ապա ձեզ մոտ բարձր է հոդատապի զարգացման վտանգը։
Ինչպե՞ս բուժել հոդատապը Նախ անհրաժեշտ է ստանալ ճշգրիտ ախտորոշում:
• Իրականացրեք արյան հետազոտություն՝ միզաթթվի և կրեատինինի ( սպիտակուց, որը երիկամների աշխատանքի ցուցիչն է) մակարդակը որոշելու համար,
• Իրականացրեք հոդի ռենտգեն՝ բացառելու համար բորբոքման այլ պատճառները, ինչպիսիք են տարբեր վնասվածքները,
• Իրականացրեք ՈՒՁՀ՝ բյուրեղները հայտնաբերելու համար,
• Իրականացրեք հոդում առկա սինովիալ հեղուկի հետազոտություն՝ միզաթթվի բյուրեղները որոշելու համար։ Եթե հաստատվի հոդատապը, ապա բժիշկը կնշանակի համապատասխան բուժում։
Դեղորայքի օգտագործումը արդյունավետ կերպով կանխում է հոդատապի զարգացումը, սակայն թերապիան ավելի արդյունավետ դարձնելու համար անհրաժեշտ է նաև հետևել ճիշտ սննդակարգին։ Ինչպե՞ս կանխարգելել հոդատապի զարգացումը
• Հետևեք առողջ սննդակարգին
• Սահմանափակեք պուրին պարունակող մթերքների օգտագործումը. կարմիր միս, ենթամթերք, կիսաֆաբրիկատներ, ապխտած միս:
• Մի չարաշահեք ալկոհոլի (հատկապես՝ գարեջուր) և գազավորված ըմպելիքների օգտագործումը,
• Ջուր շատ խմեք,
• Ավելի շատ շարժվեք և պարբերաբար մարզվեք,
• Օգտագործեք ցածր յուղայնությամբ կաթնաթթվային արտադրանքներ։
Աղբյուրը
Բաժանորդագրվեք նաև մեր․ Տելեգրամյան ալիքին , Ֆեսբուքյան էջին, Ինստագրամյան էջին , Յութուբյան ալիքին